અમદાવાદના વટવા GIDC વિસ્તારમાં વ્યાજખોરી અને ધમકી આપ્યાનો કિસ્સો સામે આવ્યો છે. એક મોબાઇલ વેપારીએ પિતા-પુત્ર પાસેથી ધંધા માટે 30 ટકા વ્યાજે રૂ.37.50 લાખ લીધા હોવાનો અને ત્યારબાદ 16 મહિનામાં રૂ.76 લાખ વ્યાજ ચૂકવ્યા હોવાનો ફરિયાદમાં ઉલ્લેખ કર્યો છે. વેપારીનો આક્ષેપ છે કે મુદ્દલની રકમ સહિત મોટી રકમ ચૂકવી દીધા બાદ પણ સિક્યોરિટી તરીકે આપેલા 14 કોરા ચેક પરત કરવામાં આવ્યા નહોતા. વધુ રૂ.22.50 લાખની માંગણી કરી ચેક બાઉન્સ કરાવ્યા અને ધમકીઓ આપી હોવાના આક્ષેપ સાથે વેપારીએ વટવા GIDC પોલીસ સ્ટેશનમાં ફરિયાદ નોંધાવી છે.
દુબઈમાં ઓળખાણ બાદ 30 ટકા વ્યાજે લીધા રૂ.37.50 લાખ
ફરિયાદ મુજબ, જશોદાનગરના પુષ્કર હિલ વિસ્તારમાં રહેતા નિરવ સચાણીયા મોબાઇલ ફોનના વેપાર સાથે સંકળાયેલા છે. અગાઉ તેઓ દુબઈમાં રહેતા હતા ત્યારે તેમના ફ્લેટમાં દિપક ભારાણી અને તેમના પિતા વાસુદેવભાઈ ભાડેથી રહેતા હતા. આ દરમિયાન બંને વચ્ચે ઓળખાણ થઈ હતી.
જુલાઈ 2023માં ધંધાકીય જરૂરિયાત ઊભી થતાં નિરવે દિપક ભારાણી અને તેમના પિતા પાસેથી 30 ટકા વ્યાજે રૂ.37.50 લાખ લીધા હોવાનો ફરિયાદમાં ઉલ્લેખ છે. આ રકમની સામે નિરવે પોતાના અને પત્નીના નામના કુલ 14 સહી કરેલા કોરા ચેક સિક્યોરિટી તરીકે આપ્યા હતા.
16 મહિનામાં રૂ.76 લાખ વ્યાજ ચૂકવ્યાનો દાવો
વેપારીના જણાવ્યા અનુસાર, તેમણે સતત 16 મહિના સુધી દર મહિને રૂ.4.75 લાખ લેખે કુલ રૂ.76 લાખ રોકડા વ્યાજ પેટે ચૂકવ્યા હતા.
આ ઉપરાંત દિપક ભારાણી, તેમના પરિવારજનો, મિત્રો અને વિવિધ મોટર્સનાં બેંક ખાતાંમાં ઓનલાઇન રૂ.35.43 લાખ તેમજ રોકડા રૂ.2.07 લાખ ચૂકવ્યા હોવાનો પણ ફરિયાદમાં ઉલ્લેખ કરવામાં આવ્યો છે.
ત્યારબાદ નિરવે સિક્યોરિટી તરીકે આપેલા પોતાના અને પત્નીના સહી કરેલા કોરા ચેક પરત માગ્યા હતા. જોકે, આરોપીઓએ ચેક શોધીને પરત આપવાનું કહી સમય પસાર કર્યો હોવાનો વેપારીનો આક્ષેપ છે.
વધુ રૂ.22.50 લાખની માંગણી અને ચેક બાઉન્સનો આક્ષેપ
ફરિયાદમાં જણાવ્યા મુજબ, આશરે બે મહિના બાદ નિરવે ફરીથી ચેક પરત માગ્યા હતા. ત્યારે પિતા-પુત્રએ હજુ રૂ.22.50 લાખ બાકી હોવાનું કહી તેની ઉઘરાણી શરૂ કરી હતી.
વેપારીનો આક્ષેપ છે કે તેમની જાણ કે સંમતિ વિના સિક્યોરિટી તરીકે આપેલા કોરા ચેકમાં રૂ.22.50 લાખની રકમ ભરીને બેંકમાં રજૂ કરવામાં આવ્યા હતા. આ ચેક બાઉન્સ થયા બાદ બેંક તરફથી નોટિસ પણ મોકલવામાં આવી હતી.
ખોટા કેસમાં ફસાવવા અને જાનથી મારી નાખવાની ધમકીનો આક્ષેપ
નિરવ સચાણિયાના આક્ષેપ મુજબ, ચેક બાઉન્સની કાર્યવાહી બાદ તેમને ખોટા કેસમાં ફસાવી દેવાની, જાનથી મારી નાખવાની તેમજ મિલકત પડાવી લેવાની ધમકીઓ આપવામાં આવી હતી.
આખરે સતત ઉઘરાણી અને કથિત ધમકીઓથી કંટાળીને વેપારીએ વટવા GIDC પોલીસ સ્ટેશનનો સંપર્ક કર્યો હતો અને દિપક ભારાણી તથા તેમના પિતા વાસુદેવભાઈ સામે ફરિયાદ નોંધાવી હતી.
પોલીસે ફરિયાદના આધારે આગળની તપાસ હાથ ધરી છે. હાલ આ મામલે ફરિયાદમાં કરવામાં આવેલા આક્ષેપોની તપાસ બાદ જ સમગ્ર હકીકત સ્પષ્ટ થશે.
