જામનગર જિલ્લાના જામજોધપુર તાલુકાના જામવાડી ગામમાં જન્મથી દિવ્યાંગ 28 વર્ષીય યુવક સાથે દુષ્કર્મ આચરવામાં આવ્યું હોવાની ફરિયાદ નોંધાઈ છે. યુવકના પિતાએ ગામના જ એક શખ્સ સામે ફરિયાદ નોંધાવતાં જામજોધપુર પોલીસે ગુનો નોંધી વધુ તપાસ હાથ ધરી છે.
પિતાએ જામજોધપુર પોલીસ સ્ટેશનમાં નોંધાવી ફરિયાદ
આ મામલે રાજકોટના પાટીદાર ચોક, સાધુ વાસવાણી રોડ પર રહેતા અને મૂળ જામવાડી ગામના વતની 58 વર્ષીય બીપીનભાઈ જમનભાઈ ભડાણિયાએ પોલીસ ફરિયાદ નોંધાવી છે.
ફરિયાદ મુજબ, તેમનો મોટો પુત્ર જન્મથી દિવ્યાંગ છે અને તેને બોલવામાં મુશ્કેલી હોવાથી તે પરિવારજનો સાથે ઇશારા તથા તૂટીફૂટી ભાષા દ્વારા વાતચીત કરે છે.
રામજી મંદિરે આરતી કરવા ગયા બાદ બની ઘટના
ફરિયાદમાં જણાવ્યા અનુસાર, બીપીનભાઈ તેમની પત્ની સંગીતાબેન અને પુત્ર સાથે જામજોધપુરમાં એક પ્રસંગમાં હાજરી આપવા આવ્યા હતા. ત્યારબાદ સાંજે આશરે ચાર વાગ્યે તેઓ જામવાડી ગામે પોતાના ઘરે પહોંચ્યા હતા.
સાંજે લગભગ સાત વાગ્યે તેમનો પુત્ર ગામના રામજી મંદિરે આરતી કરવા ગયો હતો. રાત્રે આશરે 8:15 વાગ્યે ઘરે પરત ફરતાં પિતાએ તેને મોડું થવાનું કારણ પૂછ્યું હતું. ત્યારે યુવકે ઇશારા અને તૂટીફૂટી ભાષામાં પોતાની સાથે બનેલી ઘટનાની જાણ કરી હતી.
યુવકે જણાવ્યા મુજબ, ગામનો એક શખ્સ તેનો હાથ પકડીને બળજબરીથી ખેંચી ગયો હતો અને શિવમંદિર પાસે આવેલા અવાવરા મકાનમાં લઈ જઈ તેની સાથે સૃષ્ટિ વિરુદ્ધનું કૃત્ય આચર્યું હતું. યુવકે વિરોધ કરતાં તેને માર મારવામાં આવ્યો હોવાનો તેમજ ઘટનાની જાણ કોઈને કરશે તો જાનથી મારી નાખવાની ધમકી આપવામાં આવી હોવાનો પણ ફરિયાદમાં આક્ષેપ કરવામાં આવ્યો છે.
પિતાએ સ્થળની ઓળખ કરાવી આરોપી સામે ફરિયાદ કરી
પુત્ર પાસેથી ઘટનાની જાણ થયા બાદ બીપીનભાઈ તેને સાથે લઈને કથિત ઘટનાસ્થળે પહોંચ્યા હતા. ત્યાં યુવકે શિવમંદિર પાસે આવેલા મકાનની ઓળખ કરાવી હતી.
ત્યારબાદ પિતા-પુત્ર આરોપીના ઘરે પહોંચ્યા હતા. ફરિયાદ મુજબ, ત્યાં કારૂભાઈ અરજણભાઈ સંગારકા હાજર હતા અને યુવકે ઇશારા દ્વારા તેમની ઓળખ આરોપી તરીકે કરાવી હતી. આ દરમિયાન કારૂભાઈએ પોતાની ભૂલ થઈ હોવાનું જણાવ્યું હોવાનો પણ ફરિયાદમાં ઉલ્લેખ કરવામાં આવ્યો છે.
આ અંગે પોલીસને જાણ કરવામાં આવતાં 112ની પોલીસ ટીમ ઘટનાસ્થળે પહોંચી હતી અને આરોપીને પોલીસ સ્ટેશન લઈ જવામાં આવ્યો હતો.
જામજોધપુર પોલીસે વધુ તપાસ હાથ ધરી
બીપીનભાઈ ભડાણિયાની ફરિયાદના આધારે જામજોધપુર પોલીસે કારૂભાઈ અરજણભાઈ સંગારકા સામે ગુનો નોંધી વધુ તપાસ શરૂ કરી છે. હાલ ફરિયાદમાં કરવામાં આવેલા આક્ષેપોની તપાસ કરવામાં આવી રહી છે. તપાસ પૂર્ણ થયા બાદ જ સમગ્ર ઘટનાની વધુ હકીકતો સ્પષ્ટ થશે.
