બનાસકાંઠાની મુલાકાત દરમિયાન વડાપ્રધાન નરેન્દ્ર મોદીએ Bio CNG પ્લાન્ટનું ખાતમુહૂર્ત કર્યું, ત્યારથી સૌના મનમાં એક જ સવાલ છે કે આ Bio CNG શું હોય?
સામાન્ય CNG અને Bio CNG માં ફરક શું?
આપણે ગાડીમાં જે CNG પુરાવીએ છીએ તે જમીનમાંથી મળતા કુદરતી ગેસમાંથી બને છે, જ્યારે Bio CNG એ જૈવિક કચરો, ગાયનું છાણ અને ખેતીના કચરાને ખાસ પ્રોસેસ કરીને બનાવવામાં આવે છે. બંનેની ગુણવત્તા લગભગ સરખી જ હોય છે.
ભાવમાં કેટલો ફરક?
બનાસકાંઠામાં વાત કરીએ તો સામાન્ય CNG કરતાં Bio CNG પ્રતિ કિલો 7 થી 8 રૂપિયા સસ્તો મળી રહ્યો છે અને તેનું વેચાણ પણ શરૂ થઈ ગયું છે.
ફાયદો શું અને અફવાઓનું શું?
કોઈ પણ નવી ટેકનોલોજી આવે એટલે તેની સાથે અફવાઓ પણ આવે. થોડા સમય પહેલા પેટ્રોલમાં ઇથેનોલ મિશ્રણને લઈને અફવા હતી કે એન્જિન ખરાબ થઈ જશે, ટાંકીમાં કીડીઓ થશે. હકીકતમાં આ બધી પાયાવિહોણી વાતો છે. ઓટો એક્સપર્ટનું માનવું છે કે E20 પેટ્રોલથી એન્જિનને કોઈ નુકસાન નથી.
એવી જ રીતે Bio CNG ને લઈને પણ લોકો ગેરસમજ ફેલાવે છે. ખરેખર તો Bio CNG પર્યાવરણ માટે વધુ સારું છે. અગાઉ Bio Diesel આવ્યું ત્યારે પણ સરકારે ખેડૂતોને તેનો ઉપયોગ કરવા પ્રોત્સાહન આપ્યું હતું. Bio CNG પણ એવું જ છે, પ્રોપર પ્રોસેસ કર્યા પછી તે વાહનમાં વાપરવા માટે સંપૂર્ણ સુરક્ષિત છે.
